Ümumdünya İrs Komitəsinin 43-cü sessiyası iyulun 7-də günün ikinci yarısında işini davam etdirdi.
Plenar iclasda baxılan növbəti məsələ İtaliyanın təqdimatı – bu ölkənin Konelyano və Valdobbyadene bölgələrindəki Prosekko təpələri ilə bağlı nominasiya oldu.
Nominasiyaya dair ICOMOS nümayəndəsinin hesabatında deyildi ki, bu mədəni relyefdə XIX əsrdən bəri heç sənaye obyekti inşa edilməyib, hətta üzüm bağlarında bütün kultivasiya işlərini mexaniki qaydada aparırlar. Ötən sessiyada verilən tövsiyələr nəzərə alınıb, qorunan sahə 90 min hektara çatıb. Görülən tədbirlər əsas verir ki, nominasiya Ümumdünya İrs Siyahısına daxil edilsin.
Müzakirə zamanı Tunis, Azərbaycan, İspaniya, Uqanda, Küveyt, Çin və digər ölkələr müsbət rəy verdilər. Qərar layihəsi ciddi dəyişiklik olmadan qəbul edildi.
Daha sonra Amerika Birləşmiş Ştatlarının təqdim etdiyi “Frenk Lloyd Raytın 20-ci əsr memarlığı” nominasiyası müzakirəyə çıxarıldı.
ICOMOS tərəfindən hazırlanmış hesabat dinlənildi. Vurğulandı ki, məşhur memar Frenk Lloyd Raytın “orqanik memarlıq” üslubu nəinki ABŞ-da, dünya miqyasında memarlığa öz təsirini göstərib. Qısa müzakirədən sonra layihə düzəlişsiz qəbul edildi.
ABŞ nümayəndə heyəti söz alaraq əvvəlcə Azərbaycana qonaqpərvərliyə görə minnətdarlığını bildirdi və Frenk Lloyd Raytın irsinə ehtirama görə təşəkkür etdi.
