“Bölgələrdən-bölgələrə” adlı yaradıcılıq festivalının davamı olaraq Bərdə Regional Mədəniyyət İdarəsinin kollektivi “Qarşılıqlı əməkdaşlıq və mədəni əlaqələr” çərçivəsində Şəki şəhərində ekskursiya-sərgi və möhtəşəm konsert proqramı ilə çıxış etmişdir.
Noyabrın 12-də Şəki Şəhər Regional Mədəniyyət İdarəsinin Şəki şəhər 4 nömrəli Uşaq Musiqi Məktəbində Bərdə, Yevlax, Tərtər rayonlarını və Mingəçevir şəhərini özündə birləşdirən Bərdə Regional Mədəniyyət İdarəsinin yaradıcı kollektivi Mədəniyyət Nazirliyi tərəfindən “Qarşılıqlı əməkdaşlıq” devizi altında keçirilən “Bölgələrdən-bölgələrə” adlı yaradıcılıq festivalının davamı olaraq Şəki musiqisevərlərinə ekskursiya-sərgi və bayram ovqatlı musiqi proqramı təqdim etmişdir.
Məktəbin foyesində Bərdə Turizm İnformasiya Mərkəzinin təşkil etdiyi, bacarıqlı insanların əl işlərindən ibarət sərgiyə baxış həyata keçirildikdən sonra, Şəki Regional Mədəniyyət İdarəsini rəisi Mirvari Zeynalova gələn qonaqları salamlayaraq, Azərbaycan Xalq Cümhuriyyətinin 100 illik yubileyi münasibətilə Mədəniyyət Nazirliyinin təqdimatında “Bölgələrdən-bölgələrə” layihəsi ətrafında keçirilən bütün tədbirlərin ümumuilikdə mədəniyyətimizin tərəqqisinə, işgüzar münasibətlərin təkmilləşdirilməsinə və dostluq əlaqələrinin daha da möhkəmlənməsinə xidmət etdiyini bildirmişdir.
Dostluq konsertində Mingəçevir “Kür” xalq çalgı alətləri ansamblının müşaiyəti ilə Tərtər Müşviq Qurbanovun (Tərtər), Rəşad Hüseynovun (Yevlax), Azad Abışovun (Bərdə), Yasin Əkbərovun, Reyhan Rəcəbovanın, Misir Məmmədovun, Zibər Zamanovanın, Tərgül Bərdəlinin, Sərdar Əvəzoglunun və aşıq Müzəffər Şükürovun ifalarında rəngarəng musiqi nömrələri dinlənilib. Mingəçevir şəhər Mədəniyyət Mərkəzinin “Nur” rəqs qrupunun rəqsi isə tamaşaçılarda xüsusi bir coşqu yaratmışdır.
Tədbirin sonunda fəxri mədəniyyət işçisi Reyhan Rəcəbovanın, Tərgül Bərdəlinin, Sərdar Əvəzoglunun və Misir Məmmədovun birgə ifalarında səsləndirilən “Qarabag şikəstəsi” alqışlarla qarşılanıb.