Üzeyir Hacıbəyli X Beynəlxalq Musiqi Festivalı rəngarəng konsert proqramları, müəllif gecəsi və təqdimatlarla davam edir.
Beynəlxalq Muğam Mərkəzində gənc pianoçu, beynəlxalq müsabiqələr laureatı, Prezident təqaüdçüsü Vüsalə Babayevanın ifasında geniş konsert proqramı festivalın yaddaqalan musiqi gecələrindən olub. Gənc ifaçı V.Motsart, F.Şopen, Q.Qarayev və S.Prokofyevin əsərlərini səsləndirib.
Konsert proqramı tamaşaçılar tərəfindən böyük maraqla qarşılanıb.
Qeyd edək ki, Bakı şəhərində anadan olan Vüsalə Babayeva Üzeyir Hacıbəyli adına Bakı Musiqi Akademiyasının Fortepiano fakültəsini bitirib. Hazırda magistr pilləsi üzrə təhsilini davam etdirir. Gənc ifaçı bir çox respublika və beynəlxalq müsabiqələrin laureatıdır. Bolqarıstanda keçirilən XVI Beynəlxalq “Ümidlər, istedadlar, ustadlar” müsabiqəsində I dərəcəli Diploma (2011), Estoniyada təşkil olunan VII Beynəlxalq “Baltik ulduzları” müsabiqəsində II dərəcəli Diploma (2016), Almaniyada VII Beynəlxalq “Musical fireworks in Baden-Württemberg” müsabiqəsində I dərəcəli Diploma (2017) layiq görülmüşdür.