19.01.2019 06:10
Qara Qarayev adına Mərkəzi İncəsənət Məktəbində 20 Yanvar faciəsi ilə əlaqədar “Şəhidlər unudulmur” adlı tədbir keçirildi.
Əvvəlcə şəhidlərin xatirəsi ehtiramla yad edildi. Tədbirdə məktəbin direktoru Əziz Qarayusifli, müəllim Zenfira Nurullayeva faciə ilə əlaqədar öz fikirlərini bölüşdülər.
Sonra nəzəriyyə müəllimi Lalə Sinkeviç 20 Yanvar hadisələri haqqında məruzə ilə çıxış etdi. L.Sinkeviç çıxışına “Şəhidlər unudulmur və tariximiz yaşadıqca onlar da yaşayacaq” sözləri ilə yekun vurdu. Məruzə müəllim Elnur Məmmədovun “Bayatı-Şiraz”, “Şur” muğamları ilə müşayiət edildi. Faciəni əks etdirən videoçarxlar və fotolar nümayiş etdirildi.
Məktəbin foyesində balaca rəssamların “Qanlı Yanvar” şəhidlərinə həsr etdikləri sərgi nümayiş etdirildi.