Dekabrın 11-də Azərbaycan Milli İncəsənət Muzeyində Mədəniyyət və Turizm Nazirliyinin tabeliyində fəaliyyət göstərən Muzey Sərvətləri və Xatirə Əşyalarının Elmi-Bərpa Mərkəzinin 60 illiyinə həsr olunan tədbir keçirildi.
Tədbir iştirakçıları əvvəlcə muzeyin foyesində Elmi-Bərpa Mərkəzinin əməkdaşları tərəfindən bərpa olunan eksponatların yer aldığı sərgiyə baxdılar. Sonra mərkəzin fəaliyyətinə həsr edilmiş videoçarx nümayiş olundu.
Mərasimdə çıxış edən Muzey Sərvətləri və Xatirə Əşyalarının Elmi-Bərpa Mərkəzinin direktoru Zərifə Məlikova qurumun fəaliyyəti haqqında geniş məlumat verdi. Bildirdi ki, Azərbaycanda muzey sərvətlərinin bərpası işinin təməli 1957-ci ildə ilk peşəkar bərpaçı-rəssam Fərhad Hacıyev tərəfindən qoyulub: “İlk illərdə burada yalnız rəngkarlıq və qrafika əsərləri bərpa olunurdu. Bu gün isə mərkəzimizin vəzifəsi bərpaya ehtiyacı olan muzey əşyalarının qeydiyyata alınması, konservasiya işlərinin həyata keçirilməsi, muzeylərdə əşyaların mühafizə vəziyyətinin yoxlanılması və lazımi məsləhətlərin verilməsindən ibarətdir. Elmi-Bərpa Mərkəzində bu günədək 2 minə yaxın müxtəlif muzey eksponatı bərpa və konservasiya olunaraq muzeylərə qaytarılıb”.
Qeyd olundu ki, respublikamızda fəaliyyət göstərən muzeylərin kolleksiyalarına daxil olan maddi mədəniyyət nümunələrinin, sənət əsərlərinin və tarixi əhəmiyyət daşıyan sənədlərin taleyi etibarlı əllərdədir. Cənubi Qafqazda yeganə olan Elmi-Bərpa Mərkəzi artıq beynəlxalq bərpaçılıq məkanında yüksək professional vərdişlərin nümayişi ilə layiqli mövqe qazana bilib.
Tədbirdə çıxış edən mədəniyyət və turizm naziri Əbülfəs Qarayev bildirdi ki, xalqımızın mədəni irsinin qorunub saxlanılması və təbliği istiqamətində sistemli işlər həyata keçirilir: “Ölkəmizdə tarixi-mədəni abidələrin, eləcə də sənət əsərlərinin bərpası böyük əhəmiyyət kəsb edir. Bərpaçılıq sənətinin yarım əsrdən çox bir dövrü əhatə etməsi mədəni irsimizin qorunmasından xəbər verir və bu sahəyə olan diqqətin davamlılığını şərtləndirir. Ölkəmiz tarixi abidələrlə zəngindir. Arxeoloji qazıntılar nəticəsində hər il yeni-yeni mədəniyyət nümunələri aşkar edilir. Onların bəzilərinin, eləcə də muzeylərdə saxlanılan eksponatların da bir qisminin zaman-zaman bərpaya ehtiyacı yaranır. Bu baxımdan Muzey Sərvətləri və Xatirə Əşyalarının Elmi-Bərpa Mərkəzinin fəaliyyəti bizim üçün çox vacibdir”.
Nazir bərpaçılıq sənətinin daha da inkişaf etdirilməsi üçün beynəlxalq təcrübədən yararlanmağın vacibliyini qeyd etdi. Vurğuladı ki, bu sahə üzrə ixtisaslaşmış işçilər muzeylərdə də çalışmalı, həmçinin muzeylər Elmi-Bərpa Mərkəzi ilə sıx əməkdaşlıq etməlidirlər.
Əbülfəs Qarayev Prezident İlham Əliyevin 30 noyabr 2017-ci il tarixli sərəncamı ilə mərkəzin bir qrup əməkdaşının təltif olunmasını Azərbaycan bərpaçılıq sənətinə verilən yüksək dəyər kimi qiymətləndirdi.
Daha sonra mərkəzin bir qrup əməkdaşına “Əməkdar mədəniyyət işçisi” fəxri adının döş nişanı və vəsiqəsi təqdim olundu. Eləcə də mərkəzin bir neçə əməkdaşına Mədəniyyət və Turizm Nazirliyinin “Fəxri mədəniyyət işçisi” döş nişanı və fəxri fərmanlar verildi.