Nazir Əbülfəs Qarayev Rusiya Federasiyası Dağıstan Respublikasının turizm və xalq bədii sənətkarlıq naziri ilə görüşdü
Mədəniyyət və Turizm naziri Əbülfəs Qarayev Rusiya Federasiyası Dağıstan Respublikası turizm və xalq bədii sənətkarlıq naziri Rəbiyyət Zakavovanın rəhbərlik etdiyi nümayəndə heyəti ilə görüşdü.
Nazir Əbülfəs Qarayev qonaqları salamlayaraq, nümayəndə heyətini ölkəmizdə görməkdən məmnun olduğunu ifadə etdi. Dağıstan-Azərbaycan arasında turistlərin cəlb olunması istiqamətində qarşılıqlı əməkdaşlığın sürətləndirilməsi üçün işçi qaydada görüşlərin keçirilməsinin vacibliyini qeyd etdi.
Nazir Azərbaycan və Dağıstan arasında yol məsafəsinin yaxınlığının, Azərbaycanın müxtəlif turizm imkanlarınının, o cümlədən sağlamlıq turizminin, qış turizminin və qastronomik turizm növlərinin Dağıstan turistlərini cəlb edə biləcəyini vurğuladı. Qeyd olundu ki, sağlamlıq turizminin inkişafı istiqamətində dövlət tərəfindən bir sıra layihələr həyata keçirilir və Qalaaltı, Naftalan, Duzdağ və Qəbələ Rusiyadan olan turistlərin marağındadır.
Əbülfəs Qarayev eyni zamanda mayın 1-31 tarixində Bakıda keçiriləcək “Bakı Şopinq Festival” barədə məlumat verdi, festival çərçivəsində bir sıra yeniliklərin və “tax-free” sisteminin mövcudluğundan bəhs etdi və Dağıstan Respublikasının turoperatorlarını ölkəmizə dəvət etdi.
Nazir Rəbiyyət Zakavova növbəti dəfə Azərbaycanda səfərdə olmağından məmnunluq duyduğunu ifadə etdi. Azərbaycanla yalnız turist mübadiləsi deyil, Dağıstan turist sənayesinə kadr hazırlığının yaxşılaşdırılması məqsədilə Azərbaycan Turizm və Menecment Universitetində təlimlərin həyata keçirilməsində köməklik göstərilməsi xahiş olundu.
Eyni zamanda hava, dəmiryolu, avtomobil və su nəqliyyatı vasitələrinin mövcudluğundan istifadə etməklə birgə turizm marşurtları layihələrinin işlənərək digər ölkələrdən gələn turistlərə təqdim edilməsi təklif olundu.
Nazir Rəbiyyət Zakavova Dağıstan turizm şirkətlətlərinin ölkəmizə səfərində göstərdiyi dəstəyə görə Mədəniyyət və Turizm Nazirliyinə təşəkkürünü bildirdi və Azərbaycan turizm şirkətlərini də Dağıstana tanışlıq turlarına dəvət etdi.
Nazir Əbülfəs Qarayev ölkəmizə gələn turizm şirkəti nümayəndələrinin həm paytaxt Bakı, həm də regionlara səfəri nəticəsində Dağıstandan olan turistlərin Azərbaycana təşkil olunacaq səfərlərinin daha da artmasına təsir göstərəcəyindən əminliyini vurğuladı.
Sonda qonaq səmimi qəbula görə minnətdarlığını bildirdi.
