Abdulla Şaiqin Mənzil Muzeyinin və Leopold və Mstislav Rostropoviçlərin birgə təşkilatçılığı ilə 20 Yanvar
faciəsinin otuzuncu ildönümünə həsr edilmiş “Qan yaddaşı” adlı tədbir keçirildi. Tədbir Leopold və Mstislav Rostropoviçlərin Ev Muzeyində baş tutdu.Əvvəlcə şəhidlərimizin xatirəsi bir dəqiqəlik sükutla yad edildi.
L. və M. Rostropoviçlərin Ev-Muzeyinin direktoru Şeyla Heydərovaya çıxış edərək 1990-cı il yanvarın 20-də baş vermiş hadisələrdən danışdı.
Həkim-jurnalist, Borçalı qəzetinin baş redaktoru Azadə Taleh Hüseynova şəhidlik zirvəsindən danışdı. 1990-cı il yanvarın 19-dan 20-nə keçən gecə yaşanan hadisələrdən və özünün həkim kimi göstərdiyi fəaliyyətindən söhbət açdı. Öz sənət yoldaşları ilə bu dəhşətin qurbanlarına göstərdikləri tibbi yardımdan danışan A.Hüseynova, bu acıya biganə qalmayan xalqımızın da ürək, təzyiq problemləri ilə xəstəxanaya üz tutduqlarını, heç kimin dözə bilmədiyini vurğuladı.
Tədbirin bədii hissəsində Xətai rayonu 58 saylı tam orta məktəbinin şagirdlərinin ifasında “Ağla qərənfil”, “Şəhidlər” şeirləri və monoloq səsləndirildi, faciəylə bağlı səhnəcik göstərildi. Bülbül adına orta ixtisas musiqi məktəbinin şagirdləri Arif Məlikovun “Adagio”, Paqanini-Şuman “Etüd - sol minor”, Vaqif Mustafazadənin “Tək-tənha” əsərlərini, muğamlarımızı ifa etdilər.
Sonra 20 yanvar hadisələrinə həsr edilmiş qısametrajlı film nümayiş edildi.