Sabirabad rayon Tarix-Diyarşünaslıq Muzeyində gənc nəslin vətənpərvərlik ruhunda tərbiyə olunması və gənclərimizin torpaqlarımızın müdafiəsinə durmağa ruhlandırılması məqsədi ilə bir sıra tədbirlər həyata keçirilir. Bununla əlaqədar muzey fondu yeni materiallarla zənginləşdirilmiş, guşələr və sərgilər təşkil edilmişdir.
Muzeydə əsaslı təmir işlərinin aparılması ilə əlaqədar təbliğat fəaliyyətinin əsas istiqaməti səyyar sərgilər vasitəsi ilə həyata keçirilir.
“Vətəni sevmək azdır, onu qorumaq gərək” başlıqlı ilk səyyar sərgi N.Nərimanov adına 2 saylı tam Orta Məktəbdə nümayiş olunmuşdur. Məktəbin foyesində təşkil olunmuş səyyar sərgiyə baxışda 1300-dək müəllim, valideyn və şagird iştirak etmişdir.
Sərgidə Sabirabad rayonundan olan milli qəhrəmanlar Mübariz Əhmədovun, Fərhad Ağayevin, Murad Mirzəyevin, “20 yanvar” şəhidləri Zəbulla Əliyevin, Mehman Məmmədovun, “Azərbaycan bayrağı” ordeni ilə təltif olunmuş Maqsud Daşdiyevin, Daşqın Əhmədovun, Yalçın Qəhrəmanovun, azadlıq uğrunda döyüşlərdə canını fəda edən şəhidlərin şərəfli döyüş yollarını əks etdirən 230-dək fotolar, sənədlər, geyimlər və şəxsi əşyalar, gənclərin hərbi xidmətə yolasalma mərasimlərinə aid materiallar nümayiş olunmuşdur. Muzeyin əməkdaşı Günel Cəfərova sərgidə toplanan materiallarla bağlı iştirakçılara məlumat vermişdir.
Şagirdlərə muzeyin təşkil etdiyi vətənpərvərlik haqqında sorğu anketləri paylanmışdır. Sorğu anketində şagirdlər vətənə, xalqa, torpağa olan sevgi və məhəbbət hislərini ifadə edən maraqlı fikirlərini paylaşmışlar.
Qeyd edək ki, sərgi yanvar ayının sonunadək digər təhsil ocaqlarında da nümayiş etdiriləcəkdir.