Nazir müavini Nazim Səmədov “Caspian European Club” və “Caspian American Club”un iclasında iştirak etmişdir
Cari ilin 18 oktyabr tarixində mədəniyyət və turizm nazirinin müavini Nazim Səmədov “Caspian European Club” və “Caspian American Club”un iclasında fəxri qonaq qismində iştirak etmişdir.
İclasda Caspian European Club və Caspian America Club-un Sədrinin 1-ci müavini və Baş İcraçı Direktoru cənab Telman Əliyev, sözügedən təşkilatın idarə heyətinin üzvləri, Meksika, Xorvatiya və Latviya Respublikasının Azərbaycan Respublikasındakı Fövqəladə və Səlahiyyətli səfirləri, 8 ölkənin Azərbaycan Respublikasındakı Səfirliklərinin əməkdaşları, 60-a yaxın turizm və aidiyyəti sahələr üzrə özəl şirkət nümayəndələri iştirak etmişdir.
İclas çərçivəsində çıxış edən Nazim Səmədov son iki il ərzində ölkəmizə gələn xarici turistlərin sayında, eləcə də digər statistik göstəricilər üzrə müşahidə edilən artım, Ölkə Prezidenti cənab İlham Əliyevin 2016-cı il 6 dekabr tarixli Fərmanı ilə “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”nin icra vəziyyəti, Turizm Şurasının fəaliyyəti və gələcək planları, Bakı Ticarət Festivalı, ölkəmizdə Çimərlik turizminin inkişafı və bu istiqamətdə görüləcək işlər və s. barədə ətraflı məlumat vermişdir.
Çıxışdan sonra nazir müavini özəl şirkət nümayəndələri tərəfindən səsləndirilən suallara cavab vermişdir. Tədbirin yekununda Telman Əliyev Nazim Səmədova Fəxri Klub üzvlüyü sertifikatını təqdim etmiş və xatirə şəkli çəkilmişdir.
Məlumat üçün bildirək ki, Caspian European Club sıralarında dünyanın 50 ölkəsinin 5 000-dən artıq şirkət və təşkilatını birləşdirən, Xəzər-Qara dəniz və Baltik regionu dövlətlərinin ərazisində fəaliyyət göstərən və dinamik inkişaf edən regional təşkilatdır. Yarandığı ilk gündən Caspian European Club-un sədri Azərbaycan Respublikası Prezidenti cənab İlham Əliyevdir. Təşkilatın mütəmadi olaraq keçirdiyi tədbirlər biznes nümayəndələri və dövlət strukturları arasında uğurlu dialoqun qurulmasına xidmət göstərir.