Azərbaycan Respublikası Prezidenti cənab İlham Əliyevin 16 may 2017 –ci il Azərbaycan Xalq Cümhuriyyətinin 100 illik yubileyinin keçirilməsi haqqında imzaladığı sərəncama və 2018-ci ilin “Azərbaycan Xalq Cümhuriyyəti İli” elan etməsinə əsasən Azərbaycan İstiqlal Muzeyində Türkiyə Respublikasının Azərbaycandakı Səfirliyi ilə birlikdə 24 may 2018 – ci il saat 1700 - da tədbir – sərgi keçirilməsi planlaşdırılır.
2018-ci il may ayının 28-də müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyi tamam olur.
Qədim və zəngin dövlətçilik ənənələrinə malik Azərbaycan xalqı keçmişinin müəyyən dövrlərində tarixin hökmü ilə böyük imperiyalar tərkibinə qatılmaq məcburiyyətində qalmışdır. Azərbaycan Xalq Cümhuriyyəti məhz dünyanın siyasi nizamının yenidən qurulduğu bir vaxtda, XIX əsrin axırları və XX əsrin əvvəllərində Azərbaycanın yaşadığı parlaq mədəni yüksəliş mərhələsinin məntiqi yekunu kimi meydana çıxmışdır.
1918-ci il may ayının 28-də Azərbaycanın müstəqilliyini bəyan edən İstiqlal bəyannaməsi qəbul edildi. Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni imkanlarının ən son həddində çalışaraq şərəflə yerinə yetirdi. Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, dövlət quruculuğu sahəsində ciddi tədbirlər həyata keçirildi. Ölkənin ərazi bütövlüyü və milli təhlükəsizliyi təmin edildi, qısa müddətdə yüksək döyüş qabiliyyətli hərbi hissələr yaradıldı, milli tələblərə və demokratik prinsiplərə uyğun dövlət orqanları quruldu, maarifin və mədəniyyətin inkişafına xüsusi diqqət yetirildi.
Tədbirdə Azərbaycan İstiqlal Muzeyinin yeni qurulmuş “Cümhuriyyət” zalının açılışı və Türkiyənin Azərbaycandakı Səfirliyinin və Yunus Əmrə İnstitutu Bakı Türk Mədəniyyət Mərkəzi birgə “Azərbaycan Xalq Cümhuriyyətinin”, “Qafqaz – İslam Ordusunun” 100 illiyi ilə əlaqədar sərginin açılışı, 40 ədəd fotoşəkilin nümayiş etdirilməsi planlaşdırılır.
Tədbirdə Azərbaycanlı rəssam Hacıyev Elşən Sərxan oğlunun muzeyə bağışladığı “Həsrət üzəngilərinə elegiya” triptixi təqdim olunacaq.
Yeni qurulmuş zalda Azərbaycan Xalq Cümhuriyyətinin fəaliyyətini özündə əks etdirən 70 ədəd fotolar, sənədli materiallar və muzeyə hədiyyə olunmuş üç rəngli bayrağın ideya müəllifi Əli bəy Hüseynzadənin şəxsi əşyaları nümayiş etdiriləcək.
Tədbirdə Türkiyənin Azərbaycandakı fövqəladə və səlahiyyətli səfiri Erkan Özoral, Yunus Əmrə İnstitutu Bakı Türk Mədəniyyət Mərkəzinin nümayəndələri, Azərbaycan Xalq Cümhuriyyətinin tədqiqatçıları və ailə üzvləri iştirak edəcəklər.