Respublika Gənclər Kitabxanasında Beynəlxalq Sülh Günü münasibəti ilə “Dünyanı sülhə səsləyək” adı altında dəyirmi masa keçirilib
Cəfər Cabbarlı adına Respublika Gənclər Kitabxanasında Beynəlxalq Sülh Günü münasibəti ilə “Dünyanı sülhə səsləyək” adı altında dəyirmi masa keçirildi.
Tədbiri giriş sözü ilə kitabxananın direktoru Oruc Quliyev açıb bildirdii ki, BMT-nin 30 noyabr 1981-ci ildəki qərarı ilə 21 sentyabr bütün dünyada Beynəlxalq Sülh Günü kimi qeyd olunur. Dünyanın 192 ölkəsi yekdil olaraq bu qərarın lehinə səs vermişdir. 1999-cu ildə rejissor Ceremi Cilli insan cəmiyyətinin əsas problemləri və nisbətən təcili həll olunmalı olan məsələlər barəsində "Peace one day"i yaratmışdı. Onun əsas məqsədi heç olmasa ildə bircə gün atəşkəs, bütün dünyada insan zorakılığının baş verməsinin qarşısının alınması idi. 21 sentyabr nəinki yalnız xalqlar arasında, həmçinin, ailələrdə, məktəblərdə köklü zorakılığa qarşı mübarizənin əldə edilməsinə nail olmaq üçün bir gündür. Bu səbəbdən də 21 sentyabr bütün bəşəriyyət üçün çox vacibdir.
Yasamal rayon Ağsaqqallar Şurasının üzvü, fəxri müəllim Rafiq Cavadov çıxışında qeyd etdi ki, sülh mövzusu ölkəmiz üçün xüsusi əhəmiyyət kəsb edir. R.Cavadov çıxışını dahi Azərbaycan şairi Nizami Gəncəvinin ibrətamiz misraları ilə bitirdi.
Kitabxananın əməkdaşları çıxışlarında bildirdilər ki, Beynəlxalq Sülh Günü BMT-nin Nyu-Yorkdakı Baş Qərargahında yerləşən “Sülh Zəngi”nin çalınması ilə başlayır. Bu gün dünyada yüz milyonlarla insanın dərin ürək çırpıntısı, böyük ümid, şirin arzularla təkrar etdiyi müqəddəs bir söz vardır – Sülh! Bu sözün böyük mənası qanlı müharibələrin bütün iztirab və ağırlıqlarını görmüş insanlar üçün əzizdir, qiymətlidir. Dərisinin rəngindən, dini etiqadlarından asılı olmayaraq, yüz milyonlarla insan sülhü qorumaq, yeni qanlı müharibələrin qabağını almaq üçün birləşməlidir.
Tədbir boyu Beynəlxalq Sülh Gününə həsr olunmuş videoçarx nümayiş etdirildi.
Tədbirin sonunda “Biz sülh istəyirik” adlı kitab sərgisinə baxış keçirildi.
Qeyd edək ki, Yasamal rayonu Mikayıl Müşfiq adına bağda Beynəlxalq Sülh Günü münasibəti ilə “Dünyaya sülh” adlı kitab sərgisi təşkil edilmişdir. Açıq havada təşkil olunan səyyar sərgi oxucuların böyük marağına və diqqətinə səbəb olmuşdur.
