Milli dəyərlərimizin qorunub saxlanması və inkişaf etdirilməsi məqsədilə Mədəniyyətşünaslıq üzrə Elmi-Metodiki Mərkəz və AMEA-nın Folklor İnstitutu ilə birgə 12 iyun 2018-ci il tarixində AMEA-da “Respublikada folklor kollektivlərinin fəaliyyətinə dair seminar” keçirilmişdir.
Xatırladaq ki, tədbir Mərkəzin sözügedən institutu ilə imzalanmış əməkdaşlıq memorondumunun icrası çərçivəsində keçirilir. Birgə əməkdaşlığın sayəsində bu günə qədər “Qarabağ əfsanələri”, “Qarabağ mifləri”, “Qarabağ lətifələri” və s. təbliğat xarakterli çap məhsullarının geniş təqdimat mərasimləri təşkil olunmuşdur.
Seminarı Giriş sözü ilə Mədəniyyətşünaslıq üzrə Elmi-Metodiki Mərkəzin şöbə müdiri Rafiq Quliyev açmışdır.
Mədəniyyətşünaslıq üzrə Elmi-Metodiki Mərkəzin direktoru Asif Usubəliyev çıxış edərək Metodiki Mərkəz və Folklor İnstitutu arasındakı sıx əməkdaşlıq əlaqələrinin milli mədəniyyətimizi qorunmasında və təbliğində böyük rol oynadığını qeyd etdi və düşmən tərəfindən Azərbaycan milli-mədəniyyət nümunələrinin mənimsənilməsi siyasətinin qarşısının alınmasına xidmət etdiyini vurğuladı.
Tədbirdə ölkənin tanınmış folklorşünasları AMEA-nın Folklor İnstitunun direktoru, akademik Muxtar İmanov “Folklor kollektivləri: Problemlər, mülahizələr”, AMEA-nın Folklor İnstitunun şöbə müdiri , Filologiya elmləri doktoru Füzuli Bayat “Cənub bölgəsində -Halay- folklor qrupu”, AMEA-nın Folklor İnstitunun şöbə müdiri, Ü.Hacıbəyli adına BMA-nın baş müəllimi Ariz Abduləliyev “Folklor irsinin yaşamasında bədii kollektivlərin rolu”, AMEA-nın Folklor İnstitunun əməkdaşı Afaq Ramazanova “Folklor irsinin yaşamasında bədii kollektivlərin rolu”, Sənətşünaslıq üzrə fəlsəfə doktoru, Əməkdar mədəniyyət işçisi, Mədəniyyətşünaslıq üzrə Elmi-Metodiki Mərkəzin baş elmi işçisi Səadət Təhmirazqızı “Folklor kollektivlərinin inkişafında ekspedisiyaların rolu” mövzusunda məruzələr ilə çıxış etmişlər. Bundan əlavə, tədbirdə Şabran rayonu Dağbilici kəndi “Xınayaxdı” folklor kollektivinin rəhbəri Bayram Ağasıyev çıxış etmişdir.
Qeyd olundu ki, seminarın məqsədi respublikada fəaliyyət göstərən folklor kollektivlərinin fəaliyyətini araşdırmaq və onların iş prinsipi ilə tanış olmaq, repertuarlarını nəzərdən keçirmək və bu kollektivlərin bir-birilə ünsiyyət qurmasına şərait yaratmaqdır. Bu seminarlar folklorşünasların da elmi-tədqiqatları üçün mühüm bir vasitədir.